بنفس سيناريو السوبر الأفريقي و السوبر المصري، كارتيرون يتفوق كالعادة في نتيجة المبارايات الواحدة.• مبدائيا بعيدًا عن أي فنيات واضح مؤخرًا إن الزمالك بيدخل الديربي بدوافع أكبر من لاعيبة الأهلي و السبب مجهول، القوة في الالتحامات و الكرات الثنائية في أغلب مناطق الملعب لاعيبة الزمالك بتتفوق فيها و التركيز عمومًا سواء في التمركز و الاشتراكات او في إنهاء الهجمات أعلى عند الزمالك بكتير و التفاصيل دي الأهلي ياما كسب بيها ماتشات قمة مكنش متفوق فيها فنيًا و في رأيي هي تفاصيل أهم حتى من الكلام في التاكتيكس عمومًا.
• الماتش فنيًا كان متوقع بنسبة كبيرة، محاولة الإستحواذ من الأهلي و خلق أكبر عدد من الفرص مقابل تأمين دفاعي من كارتيرون و إستغلال أنصاف الفرص باللعب المباشر على أطراف الملعب لاشرف بن شرقي و محمد اوناجم، قبل الماتش قولنا إن راس مال كارتيرون أطرافه و الكثافة العددية اللي بيخلقها على اطراف المنافس لكن واضح إن فايلر معملش حساب لكدة و في كل مرة كانت بتتنقل الكورة على أطراف الملعب كان الزمالك بيروح 2 على 1 او 3 على 2.
الأهلي في الشوط الأول ب4-3-2-1 لكن بتوظيف خاطئ للاعيبة، حمدي فتحي و ديانج تايهين في الملعب و ملهمش أدوار محددة هجومية او دفاعية و قفشة مزنوق على الخط و كمان مش على عدلته و آجاي بغض النظر عن سوء حالته الفردية لكن كان مظلوم شوية في إنه بيستلم و فعلا مبيلاقيش حد قريب منه يسلمله.. في المقابل الزمالك بال4-2-3-1 الإعتيادية و إلتزام دفاعي من زيزو مع حازم إمام و حتى جبهة عبد الشافي و بن شرقي اللي تعتبر ثغرة في منظومة الزمالك بسبب عدم إرتداد بن شرقي مقدرش الأهلي يستغلها بقفشة و هاني.
شوط تاني للأهلي ب4-2-3-1 و شكل أفضل بكتير لكن قرارات اللاعيبة الفردية كانت حائل بين الأهلي و بين الفوز او حتى التعادل سواء هجوميًا من جيرالدو و مروان محسن و قفشة او دفاعيًا من ياسر ابراهيم بخطأ ساذج في هدف مصطفى محمد التاني اللي سابه فيه يستلم و يلف و يشوط و هو بيتفرج عليه زينا.
مصطفى محمد و هو بيضيع كتير الفترة الأخيرة متكلمتش عنه لأني كنت واثق إنه هيرجع يسجل لأن اولًا الإمكانيات موجودة و ثانيًا حتى الآن مشوفتش تقصير من مصطفى محمد، الموضوع كان سوء حظ مش أكتر و الحظ أنصفه في اهم ماتش للزمالك في الدوري.
إختيار محمد هاني مش غلط ده إختيار كارثي و مينفعش يتذكر على إنه مجرد اختيار لعنصر غلط والسلام.. بعد ماتش إنبي و الأهلي قولت إن محدش بيفتري على هاني لكن هاني فعلا مفتقد أساسيات الظهير، متأخر في الإرتداد الدفاعي و متأخر في الإرتداد في ظاهرة لا تحدث الا في النادي الاهلي، و بغض النظر كمان عن سوء مستوى هاني وجود أحمد فتحي و وليد سليمان في التشكيل الأساسي كان ضروري، الأهلي معندوش لاعيبة شخصيتهم تقيلة غيرهم مع علي معلول بغض النظر عن خطأ فتحي في الهدف التالت.
أليو بادجي فاجئني شخصيًا.. كنت فاكره لاعيب بتاع كور عالية و مساحات بس لكن حتى النهاردة في مساحات ضيقة واضح إنه عنده كورة تسمحله إنه يبقى مهاجم تارجت أساسي للأهلي.
أخيرًا زي ما قولت في اول البوست، الزمالك كسب الترجي في قطر و الاهلي في الامارات و الترجي في افريقيا و الاهلي النهاردة لأسباب فنية طبعا لكن قبلها أسباب تتعلق بقوة شخصية الفريق ككل في الماتشات الكبيرة عشان كدة ممكن تلاقي الزمالك بيقدم موسم محلي سئ جدًا فنيًا لكن في المناسبات الكبيرة هو اللي بيتصدر المشهد و دي ميزة كبيرة جدًا ممكن ترجح كفته في حسم بطولة أفريقيا.