كلمات
محمد عبد المنعم
منعم
كله لابس القناع
كله عامل فيها ملاك
هات لى حد ما ساب اوجاع
كله كان بركان هلاك
……………………………
المعاملة بقت مريبة
والعجيبة والغريبة
اللى مرة تقولى ضامنه
اوعى يوم تانى تأمن له
مهما بان لك منه طيبة
العشم ودفعنا تمنه
كله خاين بالتخصص
خدها منى ومنه حرص
اللى كانوا اقرب ما لينا
كانوا غمة ودبحوا فينا
حد فيهم يومها سمى
ياما داسوا سنين علينا
…………………………….
كنت بابنى وهما هدوا
اللى بيا كتير اتغدوا
لما كبروا ولما شدوا
نسيوا أسمى ونكروا خيرى
ياما طلعوا فوق كتافى
كنت حضن وقلب دافى
بس عمرى مكانش كافى
والنهاردة اهو شافوا غيرى
……………………………
مهما تاخد برضه حذرك
الوفا بقى هو وزرك
والطيابة خيابة ونظرك
من جديد عايز يتقاس
الشهامة دى موضة بطلت
من زمنا يا قلبى خلصت
ايوة نفسى بجد اسكت
طلعوا فالصو وقلت ماس
……………………………….
كله قشرة كله فالصوا
واللى زى قلبى خلصوا
خلى بالك لما يقسوا
يبقوا جواهم مرارة
هى دى اخر المتمة
حد واسى ف يوم بكلمة
شفت ياما كتير بالذمة
الف جرح وبشطارة
…………………………
كله ف جرحى ودمعى مشارك
واحد واحد منهم بارك
هات لى واحد منهم سالك
كله كان ف الغدر معلم
مين بيحس سنين اوجاعى
كله قال الضيف ده بتاعى
حد مخلص قال ايه الداعى
نجرح فيه ونسيبه يتألم
……………………………..
دول فراودة دول أساتذة
شافوا ياما ف جرحى لذة
عشت اسقيهم معزة
هما عاشوا يحاربوا فيا
كانوا اشطر كانوا اذكى
م الشيطان دول كل سكة
فرشوا ليا الشوك ما هابقى
ع اللى بكوا ف يوم عينيا
……………………………..
خدت غدر وخدت درس
م اللى شفته بقيت باللمس
يجرى ايه لو كنت بس
عشت ليا يا ناس يومين
مش هافاصل مش هابقى
مش هاسيب من تانى حقى
خدت ايه منهم وصدقى
غلطة منى من سنين
…………………………….
ايوة خدت خلاص جزائى
فرصة تانية يا دنيا انسى
لو هاعود تانى لغبائى
مش هاسامح تانى نفسى
…………………………….
كله عامل فيها ملاك