سمر إسماعيل
_ متغيرة ليه ؟!!!
= لازم أتغير … العمر بيجرى
وقلبى وعقلى عيال وبتكبر
_ غرقانة وإتعلقتى بقشة
= أنا القشة اللى بتنجد كل غريق
بس يكون بجد غريق مش بيكابر
_ بطلى تخاريف
عمر القشة م هتنقذ غرقان
مهما يحاول ولا يعافر
= دى حقيقة الكيف
ف الكيف بتبذل وبتدفع
عارف أنه هيزلك إدمان
بس القشة هتناجيك لوجة الرحمن
العبرة دايما مش ف القشة
العبرة ف قلب عايز ينجى كله إيمان
هى محاولة ف حدود المسموح
عايزة إرادة عايزة طموح
_ طيب والروح المقتولة
= الروح مش مقتولة
الروح بتمثل علشان شايفة العرض سخيف
_ هنرجع تانى لشغل الكيف
= الكيف مش شئ سيئ ولا نقمة
السيئ هو كيفية إشباعك للرغبة
أنك تطلع من الحدوتة م غير حكمة
تبقى لسه معشتش يومك وتحن لبكرة
_ وده تنجيم ولا ظنون
= أبدااااااا والله
الكيف مش بس الأفيون
الكيف إدمانك لصوت و عيون
نظم الشعر والفلسفة ده كيف
حب الشتا أو كرهة الصيف
زىّ القهوة زىّ السينما زىّ الفون
زية زىّ أفلام الكرتون
زىّ ليلى المجنون حاجة بتسعالها
بس تحافظ وتصون
= عندك لينا نصيحة بجد
_ مش كاملة علشان أنصح حد
أنا حرة ف رآىّ وقناعاتى
ومش مكفولك حق الرد