الزوجة..التانية….؟……..
بقلم علاء عامر
ورضيت أكون التانية
الزوجة الخطافة المنسية
في الضل عايشة وراضية
عن عيون الناس مخفيه
ممنوعه من الحرية
أوحتى ظهور في العلانية.
محبوسه في سجن الزوجية .
ويقولوا عليا و لسانهم..
أبرد م المبرد بشوية..
الضرة القادرة المفترية
من كل الستات معيوبة
وبحكم الناس عليا
بالنظرة الظالمة ليا
بإهانة وسخرية وإستهزاء..
كأنها مرض ومالوش دواء..
وكلامهم في الرايحة والجاية..
سكينة بتقطع فيا..
وعيونهم بتنهش فيا..
فريسة مجروحة والكل عايزها..
هدامة البيوت العمرانة..
زلزال عش الزوجية..
طيرت الراجل من عشه..
خليته يكره عيشته..
يهمل في إبنه وبنته..
ويفارق حضن حبيبته.
قلبه أتعلق بيا..
شقلبت حياته الأسريه..
نسته حقوقه الزوجية..
تايه والعشق غواه..
حيران مش لاقي دواه .
مع أنى معاه مظلومة..
صابره وراضيه ومسجونه
وعلى أيده ماضربتوش..
ولا قولت له تعالا..
راجل و لاضل حيطة
يبقى لى سند وعزوة.
وعيشة حلوة مادية
وهرب من حالة نفسية
هو الجانى عليا..
وأنا معاه الضحية..