” بكرة وبعده ”
بقلم 🖋 خالد مصطفى
حالة غريبة كلنا نمر بها أحيانًا لكن هناك اناس كتيرون تحولت عندهم الحالة دي إلى عادة وللأسف هى عادة سيئة جدا واسمها التأجيل بتشمل أحيانا كل أمور حياتهم وكل مهمة من المهام إللي عاوزين ينجزوها سواء للشغل والعمل أو للبيت او الدراسة او حتى مهام شخصية دايما بيكون قرارك بالتأجيل هو القرار الأول والمفضل عندك ودايما كلمة خلينا بكرة أو بعده نبدأ في الشغل الفلاني او الدراسة المطلوبة او حتى المشوار لزيارة طبيب للاطمئنان على صحتك وأنا أعرف واحد بقى له سنة عاوز يروح للدكتور و يأجل كل مرة بعذر جديد وساعات التأجيل بيكون بأعذار تافهة بتقنع بيها نفسك المهم إنك تأجل لبكرة وبكرة ده مش بيجي أبدا .
هنا احنا محتاجين نكسر العادة دي ومحتاجين نعرف روشتة تساعدنا على التخلص منها ، أولآ لازم نعرف احنا ليه بنأجل ونفهم ان التأجيل مش دايما كسل ولكن هو خوف من المواجهة أو الفشل حسب نوع المهمة او اننا شايفينها كبيرة وصعبة وأن إنجازها بيحتاج مهارة شديدة ومجهود كبير وهنا احب أفكرك بالمثل الشعبي ” اللي يخاف من العفريت يطلعله ” ولو فضلت خايف من انك تبدأ حتفضل تتهرب منها وهى مش مخيفة زي ما انت متخيل .
جرب قاعدة الخمس دقايق وقول لنفسك أنا هابدأ في إنجاز الحاجة دي لمدة خمس دقايق بس ولو بعد خمس دقايق حسيت انك مش قادر تكمل وقف شغل بس الغريب إنك حتكمل عارف ليه لأنك عديت أصعب نقطة وهى البداية يعني خلاص الترس دار .
نقطة كمان مهمة جدا إنك تقدر تقسم المهمة الكبيرة إلى مهام صغيرة لأن العقل بطبيعته بيرفض المهام الكبيرة وبيشوفها صعبة وبالطريقة دي المهمة تبان أسهل بكتير ومعيار الإنجاز فيها بيكون واضح .
وفي طريقة تانية اسمها تايمر بومودورو وهى إنك تشتغل او تدرس اي كان نوع المهمة بتركيز شديد لمدة خمسة وعشرين دقيقة بعدها خمس دقايق راحة مع تكرار الموضوع ده أربع مرات حتتفاجئ بنتيجة مبهرة ( أنا نفسي جربته كتير )
وأخيرًا حاول وضروري إنك تبعد عن المشتات لأن أي تشتيت صغير وأنت في حالة تركيز ممكن يرجعك من تاني لنقطة الصفر ، واعرف إنك لو فضلت تضحك على نفسك وتقول هابدأ بعدين هتفضل تلف في نفس الدايرة إنما ابدأ دلوقت حالا ولو بجزء بسيط ده بيخلي عقلك يستعيد طاقاته ويجهز لبداية إنجاز المهمة ولازم تعرف ان في ناس كتير غيرك بيمروا بنفس المشكلة دي بس الفرق أن فيهم ناس بتقرر تبدأ حتى لو هم مش جاهزين بنسبة مائة في المائة والناس التانية بتنتظر المزاج الرايق إللي غالبًا مش بيجي أبدا .
الخلاصة إنك لو فضلت تأجل عمرك ما حتعمل حاجة ، ابدأ حتى لو مش جاهز مائة في المائة أتقدم بدل ما أنت واقف في مكانك .
عادة التأجيل عادة سيئة جدا اتخلص منها قبل ما تخلص عليك .
