26
(عيشة والسلام )
كلمات /صبري حسين
من العشية
قاعدة اجهز
جبت الليمون والخضار
علي كام حزمة فجل وجرجير
رصيت بضاعتي
مشنتي فيها كل رأس مالي
بصرف منها علي عيالي
قبل الشمس ماتصحي
كنت انا صاحية
جريت بسرعة
لاني عارفة
ان الرزق يحب الخفية
طلعت من دراي
ركبت العربية انا وكتير زي حالاتي
دي بتبيع جبنة وقشطة
ودي بتبيع كام فطيرة
قصاد الفرن طول الليل في خبزهم سهرانة
ودي بتبيع طماطم وملوخية
نفضل طول اليوم قاعدين
بنستني اللي رايح شمال ويمين
علي الحر والمطر صابرين
لفضل الله شاكرين حامدين
نقابل الكل بابتسامة
رغم مافي قلوبنا من مرارة
نفضل قاعدين الشمس فوق روسنا
مافي حاجة بتحمينا
قلوبنا بتتوجع من المنهادة
الكل بيشطر علينا
ليه بس المفاصلة يا هانم
ده احنا مكسبنا ملاليم
بنبيع بكل ذمة وضمير
ليه مستخسرة فينا القليل
مع انك ممكن تسيبي
باكتر من تمن بضاعتنا
بقشيش بعد غدوة أو عشوة
في مطعم او كافيه
ليه بتستخسرو فينا ليه
مفروض تعطفوا علينا
وعلي عفة نفسنا تساعدونا
مش كفاية قعدتنا طول النهار
يا خراب بيتنا لو بار الخضار
مش كفاية علينا
معاملة البلدية
دول بيعاملونا كأننا ارهابية
ضرب وشتيمة واهانة
ورمي بضاعتنا علي الأرض
والجري ورانا كأننا بلطجية
لا بتمهم دموع شاب ولا ولية
لما حد يعاتبهم من المارة
مفيش معاهم الا نفس الكلمات
احنا بنفذ التعليمات
وجودهم عامل في الشارع اشغالات
طب يا بهوات
اعملوا لنا مكان
نقعد نبيع في بامان
احنا علينا التزمات
بنربي اولاد وبنات
في المدارس والجامعات
نظرة عطف يا بهوات
احنا زيكم بني آدميين
عايزين نعيش بكرامة
نأكل عشنا بعرق الحبين
مش بنحب مد الايد
ولا لينا في اكل الحرام
شوية رحمة يا بهوات
خلونا نحس اننا احياء مش اموات
بالله عليكم يابهوات
عاملونا معاملة انسانية
احنا بني آدمين
مش حيوانات
صبري حسين
نقاش حول الموضوع الحالي