كلام الودع

 كلمات : صبري حسين

ياست ياللي
بتشوفي الودع
تعالي قربي مني
هاتي ودعك أوشوشة
سمعيني هيقول ايه عني
نفسي اسمع خبر يطمني
محتاج يرتاح قلبي
ياست ياللي بتشوفي
الودع اوعي تداري حاجة عني
مين اللي قال
انك محتاج توشوش الودع
باينة عليك كل حاجة يا جدع
الهم راكبك
باين علي شكلك
النوم مخاصمك
مكتوب على وشك
الحزن سكنك
مطبوع على ملامحك
الودع قبل ماتوشوشه
دموع عنيه غرقته
بيتوسل لي
اوعي تخليه يقرب مني
انا موش قد حزنه
ولا أقدر اشيل همه
خليه بعيد عني
شكله قطع قلبي
عيب عليك يا ودع
عرفني اخبار الجدع
كفايك دموع
اتكلم يا ودع
طمن قلب الجدع
اللي شايفه شئ فظيع
يشيب شعر الرضيع
انطق يا ودع
اللي انا شايفه هقوله بكل وضوح
الجدع قلبه موجوع
كأنه طير مدبوح
لا عارف يجي ولا يروح
دايما الكل بايعه
حتى اللي هواه قلبه
هو ده اكتر شيء واجعه
الفرح دايما مخاصمه
عمره ما خبط على بابه
السعادة تايهة عن عنوانه
الحزن معشش جواه
الدمعة حالفة ما تفارفه
البسمة بتهرب منه
هو ده حال الجدع
مكتوب عليه العذاب
كل مايقفل للحزن باب
ينفتح الف باب وباب
يكتب جواب ورا جواب
عمره مالقى جواب
كفاية ياودع
كان عندك حق ياودع
لازم نبعد عن الجدع
قلبي عليكم اتوجع
ياما في الدنيا ناس مواجيع
صابرين على بلاويهم
مافي حد حاسس بيهم
العمري بيتسرسب من بين ايديهم
دموعهم ماتفارق عينيهم
الكل بيتفرج عليهم
مافي حد فكر يقرب منهم
بايده يمسح دموعهم
الكل مشغول بحاله
كل اللي يقدر عليه
يمصمص في شفايفه
نقول ايه
الله يكون في عونهم
على حالهم يصبرهم
مع السلامة يا جدع
ياللي بكيت الودع
خليك عايش حياتك
سلم امرك لربك
وحده القادر يزيح همك
من قلبي بقولك
ربنا يسعدك ويفرح قلبك
مع السلامة ياجدع
مع السلامة يا جدع
علشانك هبطل اضرب الودع