” لحد أمتي يادنيا “
بقلم الشاعر: محمود السعيد عبد الهادي: بورسعيد
لحد امتى يادنيا هتخدي أعز مالينا
وليه أخده منا الفرح وفي الحزن عماله تدينا
دا أحنا ياما شربنا من مرك ومن غدرك يادنيا أسينا
وليه أمواجك العاليه قاسيه قوي علينا
يادنيا أهدي شويه وزي مابنحبك حبينا
دا كفايا بحرك ملوش أخر وغاوية دايما تبعدينا
والناس بتغرق كدا علي شطك ولاقيه حد ينجينا
تهنا فيكي وأيه نركب وأي مرسي يلاقينا
ووحوش كثير كدا جواكي عماله تنهش في عنينا
لا قدرنا نعرف أيه جواكي وعلي طول يادنيا بتكوينا
من نار غدرك بتسقينا ولا طبيب حاول من الجرح يدوينا
علي الجمر ياما مشينا فيكي ومن مرك يادنيا قاسينا
لاعرفنا نركب سفينة الصبر من موجك اللي سيطر علينا
بس بإيمان ورضا الله هنعدي بحورك بأيدينا
ياموج الدنيا يامعادينا أهدي بقا وكفاية اللي فينا
ومهما حاولت تفرقنا رب الكون هيحمينا
