متابعة شيرين سلطان
الصمت
الصمت دا زى الممات
هو الحقيقة فى اللى جاى
هو الحقيقة .. فى اللى فات
طالع من الكهف الحزين ..
متغطى بتياب الحداد
فى دموعه أنات البنات
فى عيونه صرخات الولاد
من غير كلام
بيمد جوانا الضلام
و انا أصلى زيه يالتمام
نفس الدموع .. نفس الالام
نفس السكات .. نفس اللجام
نفس الأوامر والنواهى
واللى جايز .. والحرام
زيه تمام ..
حتى اما شفتك ..
وانت زى البدر فى ليل التمام
والقلب رفرف ..
زى أسراب الحمام ..
ما قدرش صوتى يبلّغك ..
ما قدرش همسى يدغدغك
و لقيتنى متسلسل بأغلال السكوت
و الصمت .. موت
و لقيتنى باتخبى ورا السرداب
خايف من الحراس ..
خايف من الحجّاب
راضى بإن الحلم يتحول سراب
راضى بإن الفرح يتبدل ..
عذاب
بقلم الشاعر أحمد الشافعى