( المسحراتي )
كلمات/صبري حسين
(21)
مسحراتي
انا المسحراتي
معاكم ليلاتي
انقر علي طبلي
بتكلم معاكم
بكل اللي يخطر علي بالي
بفتح لكم قلبي
اقول علي يفرحني واللي مزعلني
معاكم بفكر بصوت عالي
بتكلم كاني بتكلم مع نفسي
ما انتم اهلي واصحابي
جيراني وكل احبابي
ماعرفش عليكم اخبي
النهاردة يا احبابي
هتكلم معاكم
علي حاجة مزعلاني
هنتكلم يا احبابي
عن نوعية من التجار
بيعشقوا حاجة اسمها احتكار
قبل اي موسم
يخزنوا السلعة اللي عايزين يغلوها
عن المحلات يمنعوها
تسأل عن السلعة
يرد عليك والله دي مختفية
بس ممكن اجبهالك لكن هتكون غالية
الحاجة أم جنيه
من غير اسباب تبقي بعشرة
لما تحب نتكلم
يقولوا لك ده عرض وطلب
محتاج السلعة اشتريها
مش احسن ما تفضل تدور عليها
مافيا بتتحكم في الأسواق
يا اهل الخير
ده احنا ببجمعنا وطن واحد
بنشرب من نيل واحد
بنتنفس هواء الواحد الاحد
ليه بتستقوي القلب علينا
اكسب بس بالمعقول
خليك ابن اصول
ليه تمص دم الناس الشقيانة
راحت فين الأمانة
بتزود رصيدك في البنوك
هو. انت ضامن حياتك
بتكنز من حلال وحرام
بكره تسيب كله وراك
مش هتاخد حاجة معاك
فكر. هتقول. ايه لربك
ارجع يا انسان لعقلك
كل حاجة هتسال عنها مرة واحدة
الا مالك هتسال عنه مرتين
من اين جمعته
وفي ايه أنفقته
الحق نفسك
فوق من نومك
اغلب شيطانك
ارجع تاني لأصول التجارة
التجارة فن ومهارة
التجارة دي رسالة
لازم تأديها بكل أمانة
اكسب بالحلال
كل حاجة بالمعقول
ايها التجار
ليه بتكونا بنار الاسعار
خافوا من المنتقم الجبار
الاحتكار بيوصل الاقتصاد للانهيار
نصيحة من قلبي
سيبك من الاستغلال
بلاش سياسة الاحتكار
هتلاقي كل الخير
لازم تحس بالغير
الاحتكار طريق للنار
الاحتكار منهي عنه في كل الأديان
اسمع كلام خاتم المرسلين
عليه الصلاة والسلام
الجالب مرزوق والمحتكر ملعون
اسمع حديث كمان
قال عليه الصلاة والسلام
من أحتكر الطعام أربعين ليلة
فقد برئ من الله والله برئ منه
بكلمك لاني بحبك
خايف عليك
شايل همك
المال عمره ما هينفعك
افتكر يوم هتقابل في ربك
ارجع تاني لعقلك
خليك تاجر امين
ابعد عن الاحتكار
بلاش اللعب في الأسعار
ارضي برزقك الحلال
ده اللي هينفعك وينفع من بعدك العيال
ربنا يحسن لنا ولكم الختام
يا رب كلنا نعقل الكلام
سبحانه يبارك في الحلال
ايها التجار
اسمعوا كلام النبي المختار
التاجر الصدوق الأمين مع
النبين والصديقين والشهداء
مفيش تاجر امين
يتبع سياسة الاحتكار
علشان يرفع في الأسعار
ايها التجار الشطار
ربنا يرزقكم خير الجزاء
ويدخلكم جنة تجري من تحتها الأنهار
مع المتقين الاخيار
يا مسلمين يا موحدين
كل عام وانتم طيبين
رمضان كريم
صبري حسين
