ذكري اغتيال العالمة المصرية سميرة موسي
بقلم / الحسين أحمد الفار
امبارح ٥/ ٨ مش بيفكرك بحاجة ؟!
مشاغل الحياة كتير لكن شفت منشور بالصدفة ففتكرت ،..
امبارح كان ذكري اغتيال العالمة المصرية سميرة موسي الله يرحمها ،، الدكتورة سميرة موسي بالنسبالي مش مجرد شخصية علمية ممكن اشوفها واقول ما شاء الله مصر طلعت علماء كتير لكن الدكتورة سميرة موسي أنا بعتبرها قدوة ليا في شخصيتها ومسيرتها وفهمت من سرتها الذاتية ومسيرتها العلمية حاجات كتير جداً ،،
أتعلمت منها إني أحب بلدي واكون مخلص ،، أتعلمت منها أن العلاقات الدولية زي العلاقات الإنسانية مليانه تنافس وصراعات ،، واتعلمت منها أن في دول كتير تحب توقعك وتكره أنك تكون قوي وتبقي دولة عظمي ،،
أتعلمت من مسيرتها إن الإنسان لازم يكون حريص ولازم ينتبه كويس جدا هو بيتعامل ،، ينتبه للقريب قبل الغريب لان الغريب لما مابيلقيش منفذ بيلجأ للقريب ،، أتعلمت إني طول ما انا فاشل أو جاهل أو عندي لا مبالاه هعيش سعادة مزيفه و ماحدش هيعبرك وان مش بيتحارب إلا الإنسان الناجح الطموح اللي ليه اهداف تتعارض مع هداف الفاشلين أو المنافسين،،
الحياة اتغيرت والدنيا اطورت ولأني بحب علم النفس جدا وبقرأ فيه فعارف إزاي إحنا بنتحارب من دول الأجنبية سواء حروب نفسية أو حروب ناعمة وغيرها في ظل التطور التكنولوجي اللي احنا فيه علشان كده احنا محتاجين للوعي ومحتاجين نخوض ونواجه الحروب ناعمه بطريقتنا ويكون عندنا وعي ،، دولة زي الصين قوتها أصبحت تفوق دول كتير علي الساحة منهم امريكا نفسها ،، الصين دولة تاريخها عريق وأكتر حاجه عجبتني فيها أنها بتقوم نفسها بنفسها ،، بتشتغل بصمت وبتحافظ علي اسرارها ،، والعالم مش بيشوف منها غير نتائج تبهره
علشان كده الحرص والمحافظة علي الموارد وتطويرها في صمت وسريه هو أكتر حاجه ممكن تحقق تقدم لاي بلد ،، لأن في مقولة أنا اؤمن بيها ١٠٠٪ إن العظماء لا يسقطون الا بالخيانة ،، علشان كده لازم يكون فيه حرص وانتباه وعمل بجدية وسرية لأن دا تاريخ واللي بيتجاهل التاريخ بيتلاشي في المستقبل .