كلمات /صبري حسين
كلنا ركاب
علي بعض بنتعرف
نتصاحب
نتكلم
في مننا اللي بيبقوا اصحاب
واللي بسرعة يصبحوا احباب
واللي طول عمرهم يفضلوا اغراب
لكنا نفضل كلنا لقطار الحياة ركاب
اللي تيجي محطتة
ببنزل من غير كلام ولا سلام
بعد ماينزل
يتجمع كل الاحباب والاصحاب
نتكلم وعيونا مليانة استغراب
ده لسه كان معانا من شوية
معقولة كدة يروح في ثانية
نفضل نتكلم ونحكي في قصص وحكايات
نفضل نعدد في الحسنات
ده كان من المصلين
ولكتاب الله من التالين
بعد شَوية يبقي من الذكريات
والقطر ماشي في سكته
عمر مايحيد عن طريقه
يا تري مين نازل المحطة اللي جاية
مع اننا كلنا متأكدين
ان كلنا من القطر نازلين
بنتخانق ونتنازع علي مال وشوية طين
الاخ ممكن يقتل اخوه
والابن يحجر علي أبوه
علشان يرضي الهانم مراته
في دار المسنيين يرمي امه
امه اللي ياما شالت همه
الشيطان بيضحك علينا
خلي الدنيا اكبر همنا
بعدنا عن سكة ربنا
كل اللي شاغل عقولنا
لازم نأمن مستفبلنا
ومستقبل اولادنا واحفادنا
قطعنا صلة الرحم
لاعدنا نفتكر خال ولاعم
لغايت ما ركبنا الهم
حياتنا بقت غم في غم
ب ايدينا ضيعنا حياتنا
كاننا مسحورين
من المرار سكرانيين
اللي يفوقنا من سكرتنا
لما حد من احبابنا
ينزل في محطته
وقتها نفتكر اننا
ممكن تكون محطتنا اللي جاية
نعيش لحظات الندم علي افعالنا
نقف قصاد القبور
الدموع من العين تنهمر
نسمع خطبة كلها عبر
علي احبابنا نهيل التراب
نرفع اكف الدعاء
بكل توسل ورجاء
ان يرحمه ويرحمنا من العذاب
مخنوقة في صدورنا القلوب
يارب اجب الدعاء
نتقبل في المرحوم العزاء
بعد يوم او اتنين
تاخدنا من تاني الحياة
َوننسي اننا لسه في القطار راكببن
ياعالم مين هينزل قبل مين
الهي يا رحمن يا رحيم
رجعنا لطريقك المستقيم
واحسن لنا الخواتيم
واجعلنا لمحطتنا مستعدين
وادخلنا جنة النعيم
والنظر الي وجهك الكريم
امين امين يارب العالمين
وصل وسلم علي خاتم الرسل والمرسلين
سيدنا محمد وعلى آله وصحبه اجمعين
صبري حسين
