( كسرت قلبي)
كلمات /صبري حسين
ماشية في طريقي
مرة واحدة عيني
وقعت عليه
من اول نظرة
خطف قلبي
هو ده فارس احلامي
ياما شوفته في خيالي
كل ده دار في بالي
صممت اقرب منه
بحيلة ماكرة
كأني مش شيفاه
قبل ما اقع علي الارض
ايده سندتني
لمست ايديه
شعللت النار في جسمي
ابتسم اجمل ابتسامة
صوته اورتار كمنجة
انا اسف مكنش قصدي
اعذريني
بيكلمني
انا مش عارفة اتلم علي نفسي
نسيت الحروف
الكلام بيهرب مني
سمعت صوته بينادي
انت بخير يا آنسة
اخيرا جمعت قوتي
الحمد لله
ايوة انا بخير
رجع من تاني يعتذر
سامحيني
هو بيكلمني
عينه جات في عيني
توهت عن الدنيا من تاني
سمعت صوت قلبي
السهم خلاص صابني
ايوة هو ده حبيبي
بسرعة فوقت لنفسي
لكن بعد ايه
عيونه حضنت عيني
حبه سكن قلبى
كلمة منه علي كلمة مني
عرف كل حاجة عني
اسمي عنوان سكني
دراستي
فتحت له خزاين قلبي
مش عارفة ايه حصل لي
عرفته كل حاجة عني
ادق اسراري
لكني ماعرفتش اي حاجة عنه
كل اللي عرفته اسمه
مع الايام
حبي له زاد
بقيت احكي له احداث يومي
بكل التفاصيل
الملح في الاكل قليل او كتير
تعبي من طلبات ماما وكتر المشواير
كل تفاصيل يومي
من اول ما اصحي من نومي
كنت بتكلم معاه كتير
كل ما اسئله عن حاجة
يكون رده بحبك بعشقك
عمري ما لاقيت جواب
بتشتغل ايه بحبك
كلمني عن حياتك
بعشقك
دوبت في كلامه المعسول
منيت نفسي بالسعادة علي طول
مع كل يوم يزداد الغرام
عشت اجمل الاحلام
كنت بستمتع بحلو الكلام
في يوم من الايام
بابا كان علي مناسبة معزوم
اخدني انا ومام معاه
عايز يفرحنا
علي الدنيا يفرجنا
دخل بابا واحنا معاه
الكل قابلنا بترحاب
ده يفتح لنا الباب
وده يقدم لنا مشروب
انا فرحانة وبقول لنفسي
للدرجة دي بابا من الكل محبوب
بابا كان فرحان
ماسك بيد امي بكل حنان
مع انهم لهم مع بعض سنين وسنين
لكن اللي يشوفهم يقول عروسين
انا واقفة مبهورة
شايفة الكل لابس اخر موضة
رجال وستات في اجمل صورة
استأذنت من بابا اتمشي في المكان شوية
قال بس مش تبعدي عني
يادوب غبت كام دقيقة
سمعت رنت تليفوني
ده بابا بيطلبني
رجعت تاني
لقيت بابا منتظرني
تعالي يا بنتي
جالي تليفون لازم امشي
لسه بابا بيكلمني
لاقيت حبيبي جاي قصادي
بصراحة مش مصدقة نفسي
عليت دقات قلبي
ببص عليه لاقيته ماسك ايد واحدة
الرعشة مسكتني
خوفت عيوني تفضحني
ماصدقت ماما كلمتني
سمعت صوت بابا
بيرحب بحبيبي
قدمه لماما ده اعز اصحابي
مد ايده سلم علي ماما
اهلا يا هانَم
بابا بكل فرحة ليه قدمني
ودي بقي زهرة حياتي
اغلي ما عندي
دي فرحة عمري
نغم بنتي
مد ايده سلم علي
حسيت ببرود بيسري في كل جسمي
لا الايد دي مش ايد حبيبي
انقبض قلبي
سمعت نغمة نشاز اهلا يا انسة نغم
صوت غريب عني
بصيت بعيني
لاقيت ايده حاضنة ايد اللي معاه
سمعت صوته بيقول لبابا دي عزة مراتي
حب عمري
نقل كلامه لماما
دي ياهانم نبض قلبي
بسمع كلامه وانا مش مصدقة نفسي
امال اللي كان بنا ايه
فين كلامه
بحبك بعشقك
انا كنت عايش عمري مستنظرك
انت فرحة قلبي
بحاول امسك دموعي
لكنها فلتت مني
الارض مش ثابتة تحتي
بتلف بي
خنجر مغروس في قلبي
يابابا يلا نمشي
ماما لاحظت تغيري
مالك يا بنتي
مفيش حاجة يا ماما
ابص عليه
عايزة اكدب عيني
بمني نفسي
بمكن يكون بيتهيألي
كل ما عيني تدور علي عنيه
مش عارفة اوصل لها
مع انه واقف قصادي
ابص بكل تركيز
الاقي ايده حاضنة ايد مراته
عيونهم بتناجي بعضها
ابتسامة مقسومة بينهم
لمعان الحب بيان عليهم
سمعت بكاء قلبي
ياللا يا بابا ارجوك نمشي
عن اذنك يا صديقي
بكل برود بيقول لماما مع السلامة يا هانم
فرصة سعيدة يا انسة نغم
انا مذهولة
هو ده اللي من اول نظرة خطفني
اللي شغل قلبي وفكري
هو ده اللي وعدني
انه لمدن السعادة والفرح يدخلني
آه يا قلة بختي
ازاي قدر يخدعني
قضيت الليل بكلم نفسي
طلع النهار
مسكت تليفوني
ادور علي اتصال منه
لكن خاب ظني
لاقيت ايدي بترن علي رقمه
من اول رنه
فتح وقال ايوة يا قلبي
كنت منتظر اتصالك
بصوت مخنوق كله دموع بكلمه
ممكن تعرفني
ازاي تكون صديق والدي
بالتاكيد من كلامي عرفت اني بنته
ليه مش صارحتيني
ليه خدعتني
حرام عليك دمرتني
بكلمه بكل انفعال
هو بيسمعني
رده صدمني
اعمل ايه
صعبتي علي
لاقيتك مغرمة بي
حاولت اصدك
خوفت عليك
قولت احاول اسعدك
اسمعك
صدقيني انا عملت ده علشان خاطرك
استني شوية
بتقول ايه
يعني ضحيت بنفسك ووقتك
علشان خاطري
ياه للدرجة دي بتضحي
فعلا انا اللي رخصت نفسي
حبيتك من كل قلبي
في الاخر جاي تقول لي
انك ضحيت بوقتك علشان خاطري
خايف علي زعلي
عايز تطلع نفسك ملاك
مش كفاية لعبت بمشاعري
ده مجرد كلامك معايا
خيانة لمراتك
اللي بتقول عليها فرحة عمرك
راح فين وقتها حبك لعشقك
بعد كل اللي حصل منك
عايز تطلع نفسك ملاك
بعد ما كسرت قلبي
خلتني كرهت نفسي
ده انت انسان بلا اخلاق
انا ندمامة علي كل لحظة
ندمانة عن كل كلمة
ندمانة اني عرفتك
روح ربنا ينتقم منك
صبري حسين