كُن قوياً بنفسك لا بالآخرين وحارب المتنمرين بعزيمتك
متابعة دكتور عصام المصري
يروي شخصاً قصته ويقول أسمى وائل محمد صبرى مقيم بمدينه دمنهور محافظه البحيرة عمري 33 سنة
كنت حابب احكيلكم على تجربة مريت بيها وتقريبا اغلب الناس بتعانى منها وهى التنمر وعدم الثقة الصورة اللى على اليمين دى انا واللى على الشمال برضه انا بس اللى على اليمين كان تقريبا مكنش عايش كنت كل همى أكل وشرب وانام فضلت كدة لحد ما فات أفضل سنين من حياتي اللى كنت اقدر أعيش فيهم حياتى زى اى شاب أنا كنت 190 كيلو كنت عايش ميت اتحرمت من حاجات كتير ودة كان بسبب السمنة اللي كنت بعانى منها اتحرمت من انى البس زى اى شاب وأخرج واتفسح مع صحابى اتحرمت من ان اتحب وأحب بسبب عدم الثقة تعرضت للتنمر كتير كتير أوى بس كنت باخد أى تنمر بضحك وهزار عشان اللى قدامى ميحسش انه هزمنى بكلامه بس كنت بقعد مع نفسي وافتكر كلامهم عليا وتنمرهم كنت ببكى مع نفسي اتحرمت من اروح فرح اخواتى هربت اليوم دة عشان كنت بتحرج من شكلى مكنش فى حاجه البسها بقا وكدة فهربت من افرح اخواتى الاتنين حتى العزاء مكنتش بروح ، اتعرضت لتنمر من سواقين السرفيس وسواقين التاكسي كتير جدا وضاعت افضل ايام شبابى ما بين اربع حيطان واكل وشرب وتنمر وعدم ثقه كنت بمشى قدام أى محل ملابس واتفرج بس من بعيد لبعيد أصل كانت مقاسات m, xl اما انا بقا فكنت بشترى قماش 2 متر بنطلون و2 متر قميص وافضل عايش ومستخبى فيهم حقيقي بعتبر ال32 سنه دول ميت اللى على الشمال دى بعد ما اتولدت من جديد ايوة انا بعتبر نفسي عندى سنه مش 33 سنه لان دى اول سنه من حياتى اعيش فيها يوم 4/1/2021 قررت أن أعمل رچيم خدت قرار مع نفسي بعد ما حولت كل الطاقه السلبية والتنمر لطاقه ايجابيه وقولت لنفسي ان لازم اتغير واثبت للناس كلها ان اقدر اعمل اى حاجه وأصعب حاجة واثبت لكل واحد اتريق عليا ف يوم من الأيام أنى أحسن منه
بدأت وخدت خطوة وقعدت مع نفسي احسبلها همشي ازاى وقولت لازم الانجاز يكونو اتنين أن أوصل للوزن المثالى فى خلال سنه ومش بس كدة دة من غير عمليات ومن غير دكاترة ومن غير ادويه كمان دخلت تحدى مع نفسي عشان صحتى وحياتى قررت ادخل واقرى السعرات فى كل الاكل وازاى همشي واحدة واحدة عشان اقدر اكمل المشوار أنا كنت قبل الدايت وكدة كنت بفطر بخمسه ارغفه عيش كنت باكل كل حاجه في الدنيا فقررت اقلل واحدة واحدة ومنعت كل حاجه جسمى مش هيستفيد بيها والحمد لله فضلت سنه مواصل مشوارى لحد يوم 4/1/2022 ونزلت بوست بصورتى قبل وبعد والحمد لله فخور جدا باللى وصلتله مبسوط اوى ودايما بحمد ربنا بدات البس واخرج واسافر واعيش حياتى بقت الناس توقفنى وتسلم عليا وتقولى مبروك وسبحان الله هما اغلبهم كانو بيتريقو عليا زمان وبعض الناس معرفتنيش ولا مصدقه وقى يوم قبل العيد دخلت محل ملابس اشترى تيشرت لقيته بيقول قيس دة ببص لاقيته مقاس xl مبقتش مصدق واقف ف المحل مذهول مش عارف هو انا فعلا هقيس دة ولا دة حلم ولا ايه بقيت بجرى واطلع اى سلالم من غير ما انهج بقيت احب واتحب بقيت اروح اى مناسبه ب اشيك طقم الثقه رجعتلى تانى كل حاجه جميله اتحرمت منها بقيت بحسها واعيشها ومبقاش فى حاجه على لسانى غير كلمه الحمد لله الحمد لله
وبعدها قررت انى اقف جمب اى حد نفسه يخس ويلحق نفسه وانا مش دكتور ولا عمرى هوصل للى وصله اى دكتور بس انا عندى تجربه وبوصلها للى نفسه يخس وبدون اى مقابل دة وعد خدته قدام ربنا لان ربنا ادانى نعمه كبيرة اوى اوى وخلانى وصلت لكدة
كل اللى بقوله ده عشان محدش يستسلم للتنمر عليه أنت أقوى من التنمر بالتحدي مع نفسك تقدر توصل لهدفك وحلمك
