إبراهيم منصور بدر
…………(بنى آدم)……….
( 1)
من فين إمتى..
يودّى على منين،،
والنور مقطوع ؟..
كراكيب،،
وضيِقه ،،
وشوك ورود..
متقطّفة!.
إستعشى شربت..
بيبسى من اﻹزازه..
مطلعش بيبسي!.
طلعت..
وانا نازل بصيت!..
قلت يمكن ..
أشوف حروف ..
متخلينش خايف فراق..
متشدش ..
متشديش إنتى ..
نلعب مع بعض عريس وعروسه..
وننسي الدنيا ..
ف غمضة،،
وبوسه،،
وف عالم ألوانه غرام..
لماتنزل..
وانت نايم،،
والنبى تحاسب دماغى
كلت شلاليت كتير..
اسم الله عليه..
من يومه لساعتة
محدش أبداً حن عليه..
هو وهي،،
وحاجه غبية ..
بتقفل كل ببان اللهفة..
مخطوف منى إليّه العالم..
شبه ستيم البيبسي الفاير!.
………………………………
( 2 )..
من دمعتين ..
على خد متخربش وجع..
كان مين ..
ف إمتى..
يروح لفين؟..
تاتة تاتة..
السرعة وحشة..
الساعة كام،،
والساعه ليه،،
والساعه إيه؟..
فين القمر..
بنده عليه..
يلطشنى كف..
ف عز نومى!..
أقوم،،
وجسمى واجعنى منه،،
وصوابع الكف..
ف خدودى معلمه…
إتكلّمى ..
بقى فيه إيه مخلينى هاين؟..
وقفت على حد ابتسامى
..خبيت اﻵمى ..
اترص حلمى دموع ..
انا اتولدت،،
وقلبى سابق فكرتى..
شفتى إزاي..
إنّى اقدر اوجع !؟..
انا عمرى..
مفكرت ف وجعى،،
وف وجعك بس انا فكرت..
بنى آدم عمره ماعاش !..
تفرق ايه..
لو راح ومجاش،،
ولّا وقع..
من سطح البيت؟،،
وﻻ اتجن ،،
وعاش ف العشة..
مع الكتاكيت!.
……………………..
( 3)…
بقسماط ..
كمون وملح..
كوزين درة..
قعده ف كافيه..
حلم يواسينا ف المرار..
أبسط..
من اﻹحساس..
مفيش،،
ومفيش أبداً..
أصعب منه!.
عندى ابتسامة..
بتصفى لما تحسى بيّا..
مع إنّى حاسس..
إن سرى..
هياخده ضلى..
يطلّعه لباب السما ،،
وأنا لسه وحدى!..