متابعة شيرين سلطان
بقلم الشاعر أبوالخير بدر
وحشتيني
ومش قادر متوحيشنيش
ولاعارف اخبي لوعتي بيك
وظاهر زي ضوء الشمس مش خافي
ولا خجلان
من اللي شافونا بنبرجم
حمام لحمام
نطير م الفرحة ونهفهف
نلاقي الدنيا ملكينها
مدام الحب طير مطلوق
وعامل مننا جناحات
وساكن فينا بنية
وبنيه بنينا بالأمل حكايات
فكانت أحلى أمنية
ندوب في المج نتجانس
ونشرب نرتوي ونفور
ف يكبر وجدنا ويزيد
و يطرح ود يحوينا
جناين زهرها داني
ونادي يسعد المردين
يبان العشق في عنينا
شعاع من نور
وانا من وجدي جوايا
يشف القلب ويصرح
في عز الضهر وينادي
مافيش غيرك بيتمكن
ويسكن جوا بفؤادي
يانهر حنان وحنية
وبرج حمام وبنية
يادار ومدار بيجذبني
وشوقي اليك بيزيدني
وحشتيني
ولسه ع الأمل طالع
ومش راجع بدون تفسير
دا لو فيه حد كان قصدك
مهوش قصدك
دا كان قاصد يصيد قصدك
وانا قلبي زغب زغليل
يحب يحن ويحنن
يحني يحلي ايامك
ويزرع فيكِ شوق وحنين
وانا مشتاق تضميني
مابين شطين جفون نيلك
وبدعي ربنا يعينك
ويبعد عنك العزال
جدار القلب فيه وشمك
وكان الوشم بالازميل
بيحكي قصة الولهان
ونبض القلب بيردد
صدا اسمك يقول ويعيد
ويبقي العيد
في ساعة قرب من وصلك
تبان الجنة في عينيك
بتلبس ابهي ما فيها
ونبض القلب يتوتر
ودقه يزيد
وحشتني
وايدك خارجه من ايدي
بتسحب مني روح ورا روح
واروح في التوهة اتوه مني
ك قرص الشمس بيسلم
وينزل في قرار البحر
أشوف الروح بدات تخرج
وتتركني جسد فاني
أشوف البسمة بتودع
ودمع العين بدا يندع
وليل في النفس بيفرع
بيرمي جدوره جوايا
ويطرح م الثمر اتراح
وفين أرتاح
وفيه بينا جبال وبحور
وروح بتروح بلا مأوى
ولا وقت لزمان محدود
ولا كان المكان معلوم
ولكن كل يوم بحلم
بحضنك روضه م الجنة
ترد الروح وتحيني
وتبعد عني أي غيوم
ترد الروح وتحيني
وتبعد عني أي غيوم