كتبت بدموعي/ كريمة الشقري .
سافرتي يابنتي وملحقتيش يكونلك للفرح توب .
وداعك ليا كان كلمة وحشتيني، وجعها يهز قلوب .
يانور عيني ياغالية فراقك عني ماكان محسوب .
من يتمك لأم وأب قلبي كان في حزنه يدوب .
وكنت ليكي أم واهل وأبني ليكي كان محبوب .
صبرتي كتير يابنتي وصبرك في السما مكتوب .
كنا بنحسب الأيام عشان تكوني ويانا .
وكنا نغزل الأحلام أنا وأنتي بأيدينا .
تقولي ياأمي مفرحتش أقول الفرح جاي لينا .
أقولك حضني مستني يضمك وللحزن ينسينا .
تقولي ياأمي مشتاقة أكون جنبك تضمينا .
ياحبة عيني يابنتي عمرك خلص وسبتينا .
أهون عليكي ياعزة قبل اللقا تفارقينا .
أنا كنت عشمانة يزول حزنك وتحلو ليالينا .
دي كانت غالية ياربي وكانت زي أولادي .
حبي ليها كان زايد وكان حب مش عادي .
يارب تكون في الجنة مع حبيبك النبي الهادي .
وصبرني عشان قلبي موجوع وبحكمتك راضي .
