كلمات/صبري حسين
يا عم. يا عطار
ياللي عندك العطارة اصناف والوان
انا بدور ليا زمان
عن صنفين
مش عارف اجبهم منين
مستعد ادفع فيهم سواد العين
يا عم يا عطار
عايز شوية اهتمام
علي شوية حنان
عشان اعرف طريق راحة البال
سنين طويلة بلف وادور
طفت بلاد
عديت بحور
كل ما اسأل عطار
الاقي نفس الجواب
ياراجل ياطيب
انت بدور علي المستحيل
ياراجل يا طيب
فوق من الخيال
عايز حنان
وكمان اهتمام
يا عم انت بتحلم
اعقل الكلام
فتح عنيك
وبص في الوشوش
تلاقي الكل مهموم
مافيش حد راضي بالمقسوم
بص ودقق في الملامح
تلاقي الغيظ مكتوم
الكل يقولك الكيل طافح
حتي الكلام
بقي مسموم
يا عم يا ابو قلب طيب
لسه بدور علي الاهتمام والحنان
لو جيت من زمان
كان فيه منه اشكال والوان
من كتره ما كانش الدكان
في مكان
مرة واحداة اختفي من السوق
سألت عليه كتير
قالوا اتوقف الانتاج
المصانع اتطورت وبتنتج
حاجات ومحتاجات
اصناف والوان
بتنتج الوان للوشوش
عشان تقدر تختار كل يوم وش
بتنتج كل ادوات الغش
لكن الاهتمام والحنان
دي موديلات قديمة
عفا عليها. الزمان
ريح بالك
ولا تتعب نفسك
لو عندك شوية حنان في قلبك
احتفظ بيهم
واوعي توزعهم
علي كل اللي يقابلك
خليهم لنفسك
الصنف ده غير موجود
اختفي من الوجود
اخد معاه الاهتمام
يارب تعقل الكلام
وتفوق من الاوهام
لا حنان ولا اهتمام
كله كلام في كلام
علي الدنيا السلام
صبري حسين
