سحر ابوالعلا
زى النهاردة
كان أول يوم بعاد
و كل واحد فينا
عمّال يزود فى العناد
البعد طال
و الشوق فى قلوبنا زاد
و الصبر مر
و كان أمّر من البعاد
و النسيان خاصمنا
و رمانا فى بحر الذكريات
و الحنين بقي
ضيف تقيل ليلاتي يزورنا بالساعات
زى النهاردة
كان أول يوم بعاد.
البعد طال
و الساعات صبحت سنة
مين السبب
فى البعد كان هو و لا أنا.
خدنى الحنين جابني هنا
على أول مكان ضمنا
و لقيته مستني
وكأننا لا ثانية فاتت و لا سنة
مديت ايديا سلمت
و فى حضن ايده استسلمت
و عدى عليا كتير ساعات
اتاريني حاضن فى اللي فات
طيفه و شوية ذكريات
زى النهاردة من سنة ….. كان هنا