بقلم/محمد بركات
خليك ماشى ف السليم دوغرى
مهما كان طريق الشيطان يغرى
يرضى عليك ربنا ويزيد رضاه
لو تبطل فى سيرة الخلق تغرى
زمن الاخلاق فيه خلاص بح
وقل الخير منه وشح…
تاهت عقولنا ومعاها توهنا
لما اختلط الغلط ويا الصح
الدرس انتهى لموا الكراريس
تربيه وتعليم ايه بطلوا تدليس
دا كلام وبس على ورق
لاتربية شوفنا ولافيه تدريس
انا شوفت النجوم ف عز الضهر
مابين الصبح كده والعصر
سألن ايه ذنبى اللى جنيته
قالوا عشان انت هاجر مصر
الصبر ع المكروه عباده
وانا صبرى عليك بزياده
بتسوق فيها ليه وتدلل
دا انا الصبر عندر موش عاده
خليك راضى النفس بالمكتوب
دا مفيش منه ياصاحبى هروب
ترض. ماترضى لازم هيكون
وعدم الرضا عليك محسوب
انا اللى جبت ده كله لنفسي
لما سمحت للندل يصبح عليا ويمسى
وآمنته على كل اسرارى
باح حتى بسكوتى وهمسى
سرق وقال اصل الجوع كافر
عذروه وقالوا رب العباد غافر
يغفر لمن يشاء لما يكون
سعى على رزقه شقا وعافر
يابوا ايادى من الشقا متشققين
وراوى زرعك من عرق الجبين
يابوا قلب ع الزرع حانى
الفجر يشبهلك مهابه ولين
يارب ارحم كل من قال الله
ولا تترك من الالم آنين جواه
انت الكريم لا اله سواك
فكيف يضام من قال يا الله