(المسحراتي)
كلمات/صبري حسين
(20)
مسحراتي
انا المسحراتي
معاكم ليلاتي
يا كل احبابي
يا اهلي يا اصحابي
الايام الحلوة بتجري
كلها ساعات
وندخل علي العشر الاواخر
يا مقصر في اللي فات
اجتهد فيما هو آت
يا كل احبابي
مشهد شوفته بعيني
وجع قلبي
لاقيت نفسي برجع بالذكريات
ايام الطفولة والصبا
وتعاليم اهلنا في كل الأوقات
احترم الكبير
اعطف علي الصغير
ده من ثوابت الدين
نفس الكلام اللي بنسمعه من الأهل
يتكرر مع كل مدرس او مدرسة يدخلوا. الفصل
الكل كان بيعلم ويفهم
فعلا التربية قبل العلم
نصائح كانت بسيطة
كل كلمة لها قيمة
لو كنت راكب في المواصلات
ولاقيت رجل كبير او ست
او واحدة حامل
او شايلة طفل
لازم. تقوم من مكانك
وتنادي بكل ادب واحترام
اتفضل يا حج
اتفضلي يا مدام
كان الشكر مش بالكلام
تلاقي الكل في حالة ابتسام
الكل يوصفوك بالاحترام
ويدعو لأهلك الكرام
اللي ربوك علي الاحترام
كان الحب موجود في كل مكان
البيوت المدارس الغيطان
ايه اللي بدل الحال
تركب اي وسيلة مواصلات
تلاقي كل اللي شاغلين الكراسي
بنات وشباب
شايفين بعينهم الست الحامل
والرجل الكبير والست الكبيرة
تعبانين من الوقوف
مش قادرين يستحملوا الزحمة
عيونهم بتبص شمال ويمين
يمكن حد ينادي عليهم من الجالسين
لكن الكل مشغول بالكلام
مع اللي جنبه
او مشغول بتليفونه
ولو حد جه يعاتبهم
الرد يكون بكل بجاحة
المصيبة الأكبر
لما تلاقي ام ابنها
قاعد جنبها
وواقف قصادها
رجل اكبر من جدها
لو حد من الركاب
طلب منها تقوم ابنها
علشان الراجل اللي اكبر من جدها
تزعق بأعلي صوت
انا دافعة لابني تذكرة
بذمتكم مش دي قمة المسخرة
بدل ما تكون المبادرة منها
وتنادي علي الكبير في السن
سواء راجل او ست
تطلب يجي يجلس جنبها
وتبدأ. تفهم ابنها او بنتها
يا حبايبي لازم يكون عندنا رحمة
لما تشوف اي حد كبير. او تعبان
بسرعة يا حبايبي تفضوا. له المكان
لازم يا اولادي تتحلوا بالاحترام
إياك تعمل نفسك نايم
زي ما بتعمل هتلاقي
ومفيش حد علي حاله باقي
والايام مفيش اسرع منها
النهاردة انت شباب وبصحة
بكره تكبر وتكون محتاج للمساعدة
قدموا دايما الخير
هتلاقوا كل الخير
عامل زي ما تحب يعاملك الغير
يا اهلي يا احبابي
عايزين نرجع من تاني التربية
نعلم اولادنا وبناتنا الرحمة والحنية
عايزين نعلمهم يمدوا أيديهم بالمساعدة
علموهمالعطف علي الصغير
احترام وتبجيل الكبير
علموهم من الصغر
قالوا في الامثال
التعليم في الصغر
كالنقش علي الحجر
يا مسلمين يا موحدين
كل سنة وانتم طيبين
رمضان كريم
صبري حسين
