( مجرد سؤال)
كلمات/صبري حسين
**************************************
سؤال وياريت حد يجاوبني عليه
ليه كلنا بنتكلم ونكتب عن الحب
مع ان أغلبنا بعاد عنه كل البعد
مافي حد مستحمل اخوه
ولا حد طايق كلمة من صاحبه
نتكلم كلام ونعمل عكسه
نفضل نكتب مقالات عن الاخوة
وقلوبنا خلاص أدمنت القسوة
نتكلم عن الحرية الشخصية
كلنا عينا في حياة غيرنا راشقه
نفضل طول اليوم نقطع في الفروة
نفسي قبل ما نلبس عباية الموعظة
نقف لحظة مع نفسنا
نقف قصاد المرآيا
كل واحد يسأل نفسه
هو الوعط اللي للناس بوعظه
انا على نفسي بطبقه
هو انا بحاسب نفسي عن الكلمة
معقولة حياتي كلها مثالية
مفيش فيها ولا غلطة
ماشي مظبوط زي الساعة
هو انا ليه مش بتقبل الاعذار
وعايز الكل يقبل عذري
ليه دايما بقدم سوء النية
وطالب من الكل يحسنوا الظن في
ليه دايما عايز الكل يقدرني
ويتحملني ساعة غضبي
ليه عايز كل الخير لنفسي
ليه دايما مقولتي
المهم مصلحتي والطوفان من بعدي
ليه احكم عليك من كلام الناس عليك
لو حد عاملني بنفس معاملتي
أغضب والعن الدنيا اصرخ بكل قوتي
هي دي آخرة معاملتي
طب يا صاحبي تعالي اسمع مني
افهم وجهة نظري
ليه بتاخد موقف مني
ليه بتزعل على زعل غيرك
اللي بيني وبينه غير اللي بيني وبينك
من حقك تزعل لما الموضوع يخصك
لما اعيب فيك أو اجيب في سيرتك
اما تزعل وتاخد موقف مني
لمجرد حد نقل إليك حاجة عني
بالذمة ده كلام يتقال
فين عقلك
فين نور بصرك وبصيرتك
يا صاحبي يا صديقي
زي ما قال لك عني
بكرة يقول عليك لغيري
نفسي نوزن الكلام بميزان حساس
ونبعد عن الوسواس الخناس
اللي بيفرح لتفريق الناس
مفروض بالجذمة عليه ينداس
يا اخويا يا حبيبي
عامل زي ماتحب تعامل
عايزك تكون صاحي
لكل اللي حواليك واعي
دايما كون محايد
اوعي تزعل من حد
لمجرد انه زعلني
مش يمكن يكون العيب عندي
اللي زعلت منه عشان خاطري
بيحبك بيحترمك اكتر مني
شغل يا حبيبي عقلك
سبحانه ربي وربك
قال لاتذر وزارة وزر اخري
كل إنسان على نفسه بصير
ربنا سبحانه بيغفر ويسامح
بعودة عبده العاصي بيهلل وبيفرح
ليه احنا قلوبنا جاحدة
بنخاصم بلا رجعة
ليه الكبر والغرور ملكنا
الغطرسة قتلتنا
ليه قتلنا الحب جوانا
ليه لكل انهار الرحمة والحنان ردمنا
ياريت نفوق لنفوسنا
نرجع نغسل قلوبنا
نفتح للنور ابوابنا
قبل مايجي يومنا
يوم لاينفع مال ولا بنون
مفيش هناك ماتعرفش انا مين
انا عندي من الفلوس ملايين
انا كنت من المهمين المرمقين
انا من عيلة كلها ملوك وسلاطين
خلاص يا حبيبي ده كان زمان
هنا مفيش فرق بين أمير. وغفير
مايفرق أن كنت غني ولافقير
الفيصل هنا بالاعمال
من أنفق المال في سبيل الرحمن
من كسا العريان و أطعم الجعان
مش إللي أنفق شمال ويمين
عشان يقولوا عليه من المنفقين
يا صاحبي يا اخويا انا لنفسي قبلك ناصح امين
يا ريت نرجع أخوة في الله متحابين
سيبك من القيل والقال
خليك طويل البال
لا تحكم على حد من كلامي عليه
احكم عليه بمواقفه واسلوبه معاك
عايزك تعرف اننا بشر خطاين
كلنا مخلوقين من طين
اخرتنا إلى رب العالمين
سبحانه وحده اللي في ايداه الميزان
له الحكم وهو احكم الحاكمين
صبري حسين
