أحلى بنت
قصيدة للشاعر محمد الشرقاوي
أحـلى بنت في مدرستنا
شفتها ماشية في حارتنا
من عيونها البدر طل
والخدود ياسمين وفل
نفسي الاقي معاها حل
ترسم الأفراح في بيتنا
أحلى بنت في مدرستنا
—————————–
أحلى بنت ونورها باين
ماشي يضحك في المداين
والمساكن والشوارع
والنوادي والجناين
خطوها ألحان جيتار
شفت فيه أجمل نهار
صنع ربي
والرموش قالت كلام
جايه أزورك في المنام
نبتدي قصة غرام
بعد حبي
وابتديت مشوار جديد
حلمي أصبح مش بعيد
والأغاني الحلوة هلت
وابتسامة أحلى عيد
والتقينا
وابتدينا
لما أشواقنا خدتنا
أحلى بنت في مدرستنا
——————————-
أحلى بنت وياما ياما
في القلوب سهم وعلامة
شفت م العشاق كتير
في القصور لابسين حرير
واما ردت هي قالت
في الفؤاد ساكن أمير
اللي حسسني بكياني
اللي خدني من زماني
واللي حالف يبني بيتنا
صدق مش حبة أماني
السعادة مش فلوس
السعادة رضا النفوس
مش تبيع الحب لحظة
أو على الإحساس تدوس
عمرنا محسوب تمام
بالثواني والساعات
ليه يضيع وسط الملام
نبكي دايما ع اللي فات
ننسى فرحة في يوم نادتنا
أحلى بنت في مدرستنا