جوة منك
كلمات: فاطمة خاطر
جوه منك حد تاني ماتعرفوش
اللي عارفه بس منه يادوب رتوش
اسمه سنه سكنه لونه
طوله وزنه لون عيونه
شهادته ايه واسم عيلته
متداري به هموم جيوش
م المعارك عشت فيها
دمع مش عارف تحوش
انه ينزل تاني سيل
ان مره تنام في ليل
ان تمنع حزن ويل
ان يبقى لك وشوش
زي غيرك م الخلايق
كل شئ حواليك يضايق
اللي تهواه لك يفارق
فص ملح يدوب يبوش
انت مش عارف بإنك
حد تاني ماتعرفوش
تعرفه وقت الشدايد والمصاعب
تعرفه وقت المآسي والمصايب
لما يتساقط قناعه
وتلقى له وش الوحوش
تبقى مخضوض فى البداية
تقول محال ده يكون انا
بس دي هيه الحكاية
فى الحياه تمنك قروش
لو بتملك وش ارنب
م الاذي ما تلحق تحوش
اما لو وش التعالب والديابة
يتفتحلك الف باب مانت وياك الجيوش
حس عالي وصوت جهور
قسوه ظلم كبر وفجور
غاوي ضلمه كاره ل نور
يظهر اللي له تحوش
مش باقولك
جوه منك حد تاني ماتعرفوش