حوار برأس حواء المصرية
بقلمي ماجي المصري
سؤال يدور كل يوم برأس حواء المصرية وكأنه من الموروثات
“هاناكل ايه النهاردة “
والله ما اعرف ممكن ناكل ايه النهاردة
اللحمة المجمدة ب 250 جنيه والبلدي داخله علي 400 جنيه
لاء لاء خلاص مش عايزين نأكل لحمة خالص بناقص منها هي مش وحمه يعني
طيب خلاص ايه اخبار الفراخ معاك
اه الفراخ دي بقت موضوع
كيلو الفراخ ب 80 جنيه يعني فرخة كيلو ونص ب 150 جنيه تقريبا واكلة ساعتها وشكرا
اما بقي لو فكرت في البانية فبلاش احسن
الكيلو منه بقي ب 180 أو 200 جنيه
لاء لاء خلاص بلاها فراخ وبلاها بانيه مش عايزين نأكل فراخ خالص
طيب ايه رايك نمشيها سمك اهو بروتين خفيف ومفيد وسهل الهضم
خلاص نمشيها سمك وخلاص اه جيت في ملعبي يا جميل كيلو البلطي الصغير ب 70 جنيه والكبير الحلو منه ب 100 دا البلطي بس سمك الغلابة مش هانتكلم طبعا عن اسعار الاسماك الاخري
يانهار ابيض ايه دا معقوله
اه والله معقوله
لاء لاء خلاص مش عايزين انسي السمك خالص
خلاص بقي بلاها لحمة بلاها فراخ وبلاها سمك
احنا نعيش نباتين
اهي منها صحة ومنها توفير
احنا نعمل صنية مسقعة عسل وناكل ونشبع ونحمد ربنا
طيب تمام تعمل مسقعة يعني بزنجان يتحمر في الزيت طيب ياله استعد لزجاجة الزيت اللي أصبح اللتر منها باكثر من 65 جنيه
يالهووووووووي
زجاجة زيت اعمل بيها مسقعة ب 65 أن شاء الله ما اتعملت مسقعة ايوه طبعا اومال انت فاكر ايه
انا خلاص عرفت هاناكل ايه
هي حلة كشري تحل الأزمة وتشبع الجعانين
ماشي موافقين ياله بينا نعمل كشري
تمام
ايدك بقي يا جميل علي
33 جنيه كيلو رز
25جنيه كيلو مكرونة
15 جنيه ربع عدس بجبه
15 جنيه ربع شعرية
30 جنيه برطمان صلصة صغير
يانهار مش فايت ايه كل دا يعني نصرف اكتر من مية جنيه عشان نعمل حلة كشري
انسي بقي مش عايزين كشري
خلاص نقضيها فول وفلافل
طيب ياله بقي تعالي
قرص الفلافل المحشية ب خمسة جنيه
وقرص الفلافل الصغيرة بثلاثة جنيه
والعشر حبيات فول ب عشرة جنيه وازيدك بقي من الشعر بيت
كيلو البصل ب 25 جنيه
البيضة ب 5 جنيه
كيلو اللبن ب 30 جنيه وغيره وغيره وغيره كتييير كله كله سعره نار نار نار
طيب الغلبان يعمل ايه ويعيش ازاي وياكل ايه
اهداء الي الرئيس السيسي ورئيس مجلس الوزراء ووزير المالية وكل مسئول في الدولة دي
الغلبان يعيش ازاي
وياكل ايه
لما دا يكون متوسط أسعار السلع الاستهلاكية التي لا غني عنها في أي بيت
الناس تعيش منين
في كام مليون موظف وعامل في مصر دخلهم الشهري لا يتعدي ال 3000 حنيه
المفروض الأسرة الأربع أو خمس أفراد يكون دخلها كام في الشهر ومصروفها اليومي كام عشان تقدر تعيش وتحفظ ماء وجهها من ذل السؤال
ارحموا من في الارض يرحمكم من في السماء
لم نتطرق للحديث عن اسعار منتجات الألبان والبيض
واسعار المواصلات العامة والخاصة واسعار الخدمات
كهرباء ومياه وغاز
أما إذا ذكرنا العلاج فحدث ولا حرج عن اسعار كشف الأطباء والمستشفيات والأدوية التي وصلت إلي مرحلة الجنون التام
كيف يعيش رب الأسرة الذي لا يتعدي دخله 3000 جنيه
كيف يستطيع أن يكفي بيته طعام وخدمات مياه وكهرباء وغاز
كيف يربي أولاده كيف يعلمهم وينفق عليهم مصروفات تعليم
من اين له أن يكسيهم ملابس صيف وشتاء
ان اكثر من نصف الشعب المصري يعيش تحت خط الفقر
اغيثونا اغاثكم الله
ارحموا ترحموا لابد من تكاتف كافة أجهزة الدولة ووضع حلول سريعة منقذه لحل أزمة جنون الاسعار بهذا الشكل المرعب سيادة الرئيسي قبل فوات الاوان