=عكار نزفت جسد=
بقلم:الشاعر مصطفى المراد
متابعة د.عبدالله مباشر رومانيا
يا ليل عَتْمَك شِعل وتغيروا الانوار
ومَرمَغ بحقدو القهر،لَ قلوب تعباني
صرخة وَجَع طِلعت، من دمعها بعكار
ضوِّت عا كل الدني، من هم أحزانين
وقلوب دابت حزن، واحترقت بهالنار
وامّات بكيت دم، وللوجع خلقاني
يلّي قصدت الدفا، جسمك دفا للنار
صارت عيون بيتك، بالعتم غفياني
لا قدِرتْ تعطي أمل، يفَرِّح ولاد صغار
ولا كان حلم الطفل؛ محروم تحناني
يلي عهركم حقد، وبالسياسه كتار
نسيتوا حقوق الناس، تبقى منصاني/ه
غسلتوا شَرَفكم كره، وما مسحتوا العار
وتركتوا البلد للجوع و بالذل منهاني
بعدما بقلب بيروت تسببتوا بدمار
زرعتوا بحضن عكار، حقد من تاني
حرقتوا قلب الأم والطفل بقي محتار
معقول خيّ بيقتل، بالكره إنساني
نشرتوا الحزن والهم، وبالغل زرعتوا الدار
وصارت بلادي مشرَّعه، لدياب فلتاني
سرقتوا لحظة فرح، سعَّرتوها بدولار
حرمتوا كرامة ناس، وبعتوها بقناني
عكار نزفت جسد، ومكّّلله بالغار
وحدِك عروس الوطن والجيش اللبناني
خزّان جيش البلد، حققتوا الانتصار
بلحظة غضب راحوا، بلهيب خزانِ
يا هالحاكم إصحى، يا نَوْمة الختيار
حاجي وصف إرهاب، وعقول شمتاني
عكار أصل البلد، لبناني بيقدح نار
بتشهد إلو الحصون ، عا مَر الأزمانِ
مصطفى_ق _المراد