كلمات/صبري حسين
نقطة ومن اول السطر
انا موش بحب اكون رد فعل
ولا بحب موضوع المعاملة بالمثل
يعني انا لو مسألتش مرة
يبقي انت ماتسألش
بالذمة ده كلام يدخل العقل
اي علاقة في الكون
محتاجة نضوج عقل
ان كنت متعود مني كل يوم اسأل عليك
وفي يوم عنك غبت
ا.ب الأصول
انك تنشغل وتسأل
مافيش اصعب علي الانسان يشعر
انه مالهوش دور
ولا بيفرق مع حد
وانه مجرد كمالة عدد
طالما ظاهر في الصورة
الكل فاكره وعارفه
ولاي سبب مره عن
الصورة غاب
ولا حد يفتكره
ولما تيجي تعاتب
بعشم وبحب
يكون الرد
عيب عليك ده انت جوة جوة القلب
قلب ايه
وفشة ايه
ده كلام شبعنا منه
السؤال يا هانم ويا بيه
اصبح مافيش اسهل منه
اتصال تليفون
او رسالة علي الفيس
ده لو كان الغايب فعلا عزيز
لكن الظاهر اصبح زي مابيتقال في الامثال
كله عند العرب صابون
وكلها تسلية وخلاص
وبلاها نادية وخد سوسو
والبركة في الموجود
واحمد زي الحاج احمد
ولما يرجع الغايب
نقف طابور نسلم عليه
وب ابتسامة عريضة
وبصوت كله تأثر نقوله
حمد الله علي السلامة
عود. احمد
والله كنا مفتقدينك
وهما ولا حسه بغيابه
العلاقات بقت سطحية
خالية من الدسم والحنية
اهو كله عايش في المهلبية
وتسأل وتقول فين العلاقات الانسانية
يقولك ياعم الدنيا لاهيانة
ولقمة العيش قرفانة
كلنا دايرين في الساقية
ومافيش وقت لاي حاجة
مع انك ساعة اي مباراة
تلقي القهواي مليانة
والوقت اصبح متاح
والكل بيصرخ علي كورة
دي فاول وده جون
بالذمة ده مش جنون
اهو كلام واحد مجنون
عايش في زمن فات
دايما بيدور علي وجع القلب
واحد بيحلم بالحب
عايز يرجع الزمان
لعصر ولي وفات
عصر كان
كل شيء في له طعم
وكل حاجة بتتعمل بحب
الصداقة بجد
الفن له هدف وبيوصل رسالة
كل شيء بيتوظف صح
فيلم او. اغنية
مقالة كانت او مسرحية
موش كله سمك لبن تمر هندي
ولا مبدا اخطف واجري
والله انا قلبي اتوجع
مابقيت عارف الصبية من الجدع
ناقص علشان اعرفهم اضرب الودع
ياعالم ياهو
انا عقلي لسه سليم
ولا مكاني العباسية
في مستشفي الأمراض النفسية
علي فكرة وبكل صراحة
ولان الصراحة راحة
لو مكاني العباسية
عايز سرير بالمجان
لاني مفلس وجيوبي انظف من الصيني بعد غسيله
علشان مش بحب المشاكل
لو مافيش سرير بالمجان
هلبس بدلة وعليها رتب كتيرة
وامسك صفارة
واقف في اجدعه ميدان
وهاكون اكرم منكم
واقف انظم المرور بالمجان
لاني حتي وانا مجنون
هافضل انسان
عاقل انسان
مجنون انسان
لغايت ما هاموت هافضل انسان
حتي لو فضلت مجهول العنوان
هافضل انسان
صبري حسين